দৈনিক হিট ট্ৰেকাৰ
দিনটোৰ ভিতৰতে সৰ্বাধিক উষ্ণতা নথিভুক্ত কৰি দেশৰ অন্যতম উষ্ণ চহৰ হিচাপে আত্মপ্ৰকাশ
DD TIMES দিল্লী, ৬ ছেপ্টেম্বৰঃ ৫ ছেপ্টেম্বৰত গুৱাহাটীবাসীয়ে লাভ কৰিলে দিনটোৰ সৰ্বোচ্চ তাপমাত্ৰাৰ অভিলেখ। শুকুৰবাৰৰ দিনটোত গুৱাহাটীত আকাশ মেঘাচ্ছন্ন আছিল যদিও গৰমৰ প্ৰকোপ পিছে মুঠেও নকমিল।
ইয়াৰ বিপৰীতে গুৱাহাটী বাসীয়ে আজিৰ দিনটোত বিগত কিছু দিনৰ তুলনাত সৰ্বোচ্চ তাপমাত্ৰাৰহে সাক্ষী হল। ডেইলী হিট ট্ৰেকাৰ বুলেটিনত প্ৰকাশ পোৱা মতে, শুকুৰবাৰে গুৱাহাটীয়ে দিনটোৰ ভিতৰতে সৰ্বাধিক উষ্ণতা ৰেকৰ্ড কৰি দেশৰ অন্যতম উষ্ণ চহৰ হিচাপে আত্মপ্ৰকাশ কৰে।
গৰমৰ বাবে মহানগৰীৰ বাসিন্দাসকলৰ মাজত অস্বস্তি তীব্ৰতৰ হৈ পৰে।৫ ছেপ্টেম্বৰত গুৱাহাটীত দিনৰ সৰ্বোচ্চ উষ্ণতা আছিল ৩৫ ডিগ্ৰী চেলছিয়াছ। ভাৰতৰ বতৰ বিজ্ঞান বিভাগৰ তথ্য অনুসৰি এই উষ্ণতা অঞ্চলটোৰ বাবে স্বাভাৱিকতকৈ অধিক আছিল যদিও ২০২৩ চনৰ ছেপ্টেম্বৰ মাহত সৰ্বোচ্চ উষ্ণতা অধিক ৰেকৰ্ড কৰা হৈছিল।গুৱাহাটীৰ দিনৰ গৰমৰ সমান্তৰালকৈ কেইবাখনো চহৰত নিশাৰ সময়ত অস্বাভাৱিকভাৱে উচ্চ উষ্ণতাৰ তথ্য পোৱা গৈছে।
৪ ছেপ্টেম্বৰত গুৱাহাটীৰ লগতে আমৰাৱতী, পুডুচেৰী, পাটনা, আৰু চেন্নাইয়ে আটাইতকৈ বেছি উষ্ণতা নথিভুক্ত কৰিছিল। বতৰ বিজ্ঞানীসকলে সৰ্বোচ্চ আৰু সৰ্বনিম্ন উভয় উষ্ণতা বৃদ্ধিৰ কাৰণ দীৰ্ঘদিনীয়া শুকান পৰিস্থিতি, বৰষুণ কম হোৱা আদি কাৰক বোৰকেই দায়ী কৰিছে।
বিশেষজ্ঞসকলে এইটোও সকীয়াই দিছে যে ৰাতিৰ সময়ত ধাৰাবাহিকভাৱে উচ্চ উষ্ণতাই স্বাস্থ্যৰ বাবে গুৰুতৰ বিপদৰ সৃষ্টি কৰিব পাৰে, কিয়নো নিশাও গৰম বেছি হলে দিনৰ গৰমৰ চাপৰ পৰা শৰীৰে আৰোগ্য লাভৰ সময় কম পায়।
ভাৰতৰ বতৰ বিজ্ঞান বিভাগে এই ক্ষতিগ্ৰস্ত অঞ্চলসমূহৰ নাগৰিকসকলক হাইড্ৰেটেড হৈ থকা, পৰাপক্ষত ৰ’দৰ সংস্পৰ্শৰ পৰা আঁতৰি থকা, ঘৰৰ ভিতৰতে শীতল পদ্ধতি ব্যৱহাৰ কৰাকে ধৰি সতৰ্কতামূলক ব্যৱস্থা গ্ৰহণ কৰিবলৈ আহ্বান জনাইছে।
পৰিৱেশবিদসকলে সেউজ আৱৰণ বৃদ্ধি, চহৰৰ তাপ অঞ্চল হ্ৰাস কৰা আৰু বৃদ্ধি পোৱা উষ্ণতাৰ দীৰ্ঘম্যাদী প্ৰভাৱ কম কৰিবলৈ বহনক্ষম পদ্ধতি গ্ৰহণ কৰাৰ ওপৰত গুৰুত্ব আৰোপ কৰিছে। উল্লেখ্য আই এম ডিয়ে পূৰ্বানুমান কৰিছিল যে ৫-১১ ছেপ্টেম্বৰলৈ সৰ্বোচ্চ উষ্ণতা অসমৰ বেছিভাগ ঠাইতে স্বাভাৱিকৰ পৰা স্বাভাৱিকৰ ওপৰত হ’ব।
উল্লেখ্য ২০২৩ চনৰ ছেপ্টেম্বৰ মাহত গুৱাহাটীত অধিক তীব্ৰ গৰমৰ ঢৌৰ সৃষ্টি হৈছিল, সৰ্বোচ্চ উষ্ণতা ৩৮.২ ডিগ্ৰী চেলছিয়াছ। ইয়াৰ ফলত চহৰখনৰ বাবে ছেপ্টেম্বৰ মাহত এক নতুন অভিলেখ সৃষ্টি হৈছিল।
গুৱাহাটীত এতিয়ালৈকে সৰ্বোচ্চ উষ্ণতা ৪০.৩ ডিগ্ৰী চেলছিয়াছ, যিটো ১৯৬০ চনৰ ১ মে’ত সংঘটিত হৈছিল। ২০২৫ চনৰ ৫ ছেপ্টেম্বৰৰ আগৰ সময়ছোৱাত অসমত বৰষুণৰ পৰিমাণ দীৰ্ঘকালীন গড়ৰ তলত আছিল, যিটো কাৰকে উচ্চ উষ্ণতাত অৰিহণা যোগাব পাৰে।
