বিশ্ব বিনিয়োগকাৰী সপ্তাহ ২০২৫ঃ অসমসহ সমগ্ৰ পূব-উত্তৰ ভাৰতত আৰ্থিক সজাগতা বৃদ্ধিৰ বাবে SEBI আৰু BSEৰ উদ্যোগ— নাট্য প্ৰদৰ্শনৰ মাধ্যমেৰে সচেতনতা অভিযান
বিশ্ব বিনিয়োগকাৰী সপ্তাহ ২০২৫ঃ অসমসহ সমগ্ৰ পূব-উত্তৰ ভাৰতত আৰ্থিক সজাগতা বৃদ্ধিৰ বাবে SEBI আৰু BSEৰ উদ্যোগ— নাট্য প্ৰদৰ্শনৰ মাধ্যমেৰে সচেতনতা অভিযান
DD TIMES গুৱাহাটী, ১২ অক্টোবৰঃ Securities and Exchange Board of India (SEBI) আৰু Bombay Stock Exchange (BSE)-এ যৌথভাৱে আৰম্ভ কৰিছে এক ব্যাপক বিনিয়োগকাৰী সজাগতা অভিযান, যি বিশ্বব্যাপী উদযাপিত World Investor Week (WIW) ২০২৫-ৰ অংশ হিচাপে অনুষ্ঠিত হৈ আছে ৬ অক্টোবৰৰ পৰা ১২ অক্টোবৰ, ২০২৫ পৰ্যন্ত। এই উদ্যোগটো SEBI SMART প্ৰদীপ কুমাৰ মুনৰ সমন্বয়ত আগবঢ়োৱা হৈছে।
এই অভিযানৰ অংশ হিচাপে অসমৰ অন্যতম আগশাৰী সাংস্কৃতিক আৰু সামাজিক সংগঠন “নিৰ্বাক”-এ বাটৰ নাটৰ এক শৃঙ্খলা মঞ্চস্থ কৰি নাগৰিকসকলৰ মাজত আৰ্থিক সাক্ষৰতা আৰু দায়িত্বশীল বিনিয়োগৰ বিষয়ে সচেতনতা সৃষ্টি কৰিছে।
কাৰ্য্যসূচীটো গুৱাহাটীৰ পৰা আৰম্ভ হৈ অসমৰ বিভিন্ন স্থানত— তেজপুৰ, বিশ্বনাথ চাৰিআলি, নগাঁও, কাৰ্বি আংলং, কাজিৰঙা আৰু জাগীৰোডত অনুষ্ঠিত হ’ব, তাৰ পিছত ই অৰুণাচল প্ৰদেশ (ইটানগৰ), মেঘালয় আৰু নাগালেণ্ডৰ দিশে আগবাঢ়িব।
হাস্যৰস, গল্পবৰ্ণনা আৰু প্ৰত্যক্ষ দৰ্শক অংশগ্ৰহণৰ মাধ্যমেৰে এই নাট্যপ্ৰদৰ্শনসমূহে SEBI-ৰ গুৰুত্বপূৰ্ণ বাৰ্তা— ঠগ বিনিয়োগ যোজনা পৰা সতৰ্ক থাকা, তথ্যৰ উৎস যাচাই কৰা, আৰু সজাগ তথা জ্ঞানী বিনিয়োগকাৰী হোৱাৰ প্ৰেৰণা প্ৰচাৰ কৰিছে।
এই নাট্য শৃঙ্খলাৰ পৰিচালক মিনাংক দেকা, যিনি টিম নিৰ্বাকৰ প্ৰতিষ্ঠাতা আৰু ভাৰত চৰকাৰৰ সংস্কৃতি মন্ত্ৰালয়ৰ বহু সন্মানৰ গৌৰৱ অৰ্জনকাৰী। তেওঁ দেখুৱাইছে কেনেকৈ সাংস্কৃতিক শিল্প আৰু অভিনয় কলা সমাজ-শিক্ষামূলক বাৰ্তা প্ৰচাৰত এক শক্তিশালী মাধ্যম হিচাপে ব্যৱহাৰ কৰিব পৰা যায়।
SEBI SMART প্ৰদীপ কুমাৰ মুনে কৈছিলঃ
“আর্থিক সাক্ষৰতা মানে ক্ষমতায়ন। পথনাট্যৰ মাধ্যমেই আমি সোজাকৈ মানুহৰ হৃদয়লৈ পৌঁছাই সজাগ আৰু নিৰাপদ বিনিয়োগ কৰিবলৈ প্ৰেৰণা দিছো।”
SEBI, BSE আৰু টিম নিৰ্বাকৰ এই মিলিত উদ্যোগে কলা আৰু জনসচেতনতাৰ মাজত এক সুন্দর সংযোগ স্থাপন কৰি পূব-উত্তৰ ভাৰতৰ সমাজক আৰ্থিকভাৱে সজাগ আৰু জ্ঞানসমৃদ্ধ কৰি তুলিব বুলি আশা প্ৰকাশ কৰিছে।
