World Children’s Day: “বিশ্ব শিশু দিৱস”ত উত্তৰ-পূব ভাৰতত সুৰক্ষা আৰু শিক্ষাৰ বাবে শিশুৱে দিলে ডিজিটেল আন্দোলনৰ নেতৃত্ব

“বিশ্ব শিশু দিৱস”ত উত্তৰ-পূব ভাৰতত সুৰক্ষা আৰু শিক্ষাৰ বাবে শিশুৱে দিলে ডিজিটেল আন্দোলনৰ নেতৃত্ব

গুৱাহাটী উচ্চ ন্যায়ালয়ৰ মুখ্য ন্যায়াধীশে শিশুৰ সুৰক্ষা শক্তিশালী কৰিবলৈ শিশু ন্যায় সচিবালয়ৰ প্ৰস্তাৱ আগবঢ়ায়

ইউনিচেফ আৰু বি ভি এল অভিযানে “বিশ্ব শিশু দিৱস”ত ১০ লাখৰো অধিক লোকক অনুপ্ৰাণিত কৰে; কাৰণ যুৱচামে ইনফ্লুয়েঞ্চাৰসকলক বাল্য বিবাহৰ বিৰুদ্ধে শক্তিশালী কণ্ঠ হোৱাৰ বাবে আহ্বান জনাইছিল

DD TIMES গুৱাহাটী, ২২ নৱেম্বৰ ২০২৫ঃ অসম তথা উত্তৰ-পূৰ্বাঞ্চলৰ বিভিন্ন প্ৰান্তৰ শিশু আৰু কিশোৰ-কিশোৰীসকলে “বিশ্ব শিশু দিৱস”ক নিজৰ অধিকাৰৰ বাবে এক শক্তিশালী আন্দোলনলৈ ৰূপান্তৰিত কৰিছে। বাল্য বিবাহ প্ৰতিৰোধ, কন্যা সন্তানসকলক বিদ্যালয়ত নামভৰ্তি আৰু সকলো শিশুৰ বাবে সুৰক্ষিত সমাজ গঠনৰ লক্ষ্যৰে ডিজিটেলী আৰু বাস্তৱসন্মতভাৱে কাম কৰা হৈছে।

ইউনিচেফৰ মূল দায়িত্ব হ’ল- প্ৰতিটো শিশু সুৰক্ষিত অৱস্থাত জীয়াই থকা, শিক্ষা লাভ কৰা আৰু সমাজৰ বিভিন্ন দিশত অংশগ্ৰহণ কৰিব পৰাটো সুনিশ্চিত কৰা। এই অভিযানে যুৱচামক সৃষ্টিশীল, সিদ্ধান্ত গ্ৰহণকাৰী আৰু চৰকাৰ তথা নাগৰিক সমাজৰ সম অংশীদাৰ হিচাপে আগবাঢ়ি যাবলৈ উৎসাহিত কৰিছে।

২০২৫ বৰ্ষত এই দিৱস পালনৰ মূল বিষয়বস্তু আছিল — “মোৰ দিন, মোৰ অধিকাৰ, মোৰ খেল”; য’ত ব্ৰহ্মপুত্ৰ ভলীবল লীগ (বি ভি এল)ৰ খেলুৱৈসকলক দেখুওৱা হৈছে। কেৱল মোবাইল ফোন ব্যৱহাৰ কৰি খেলুৱৈসকলে শিক্ষাৰ অধিকাৰ আৰু সুৰক্ষা, নিজৰ দৈনন্দিন জীৱন, বিদ্যালয়, ঘৰ আৰু ভলীবল ক’ৰ্টৰ অভিজ্ঞতা ফটো-ভিডিঅ’ৰ জৰিয়তে ধাৰাবাহিকভাৱে প্ৰদৰ্শন কৰিছিল। এই কাহিনীবোৰে শিশুসকলৰ লগতে বিশেষকৈ ছাত্ৰীসকলে বিদ্যালয় শিক্ষা আধাতে সমাপ্ত কৰাৰ আঁৰৰ কাৰণবোৰ আৰু বাল্য বিবাহৰ চাপৰ প্ৰতিচ্ছবি স্পষ্টৰূপত দাঙি ধৰিলে। সামাজিক মাধ্যমত বহুলভাৱে প্ৰচাৰিত হোৱাৰ লগতে ইনফ্লুয়েঞ্চাৰসকলেও শ্বেয়াৰ কৰাত এই বিষয়বস্তুবোৰ ১০ লাখতকৈও অধিক লোকৰ কাষ চাপে আৰু জনসমৰ্থনো লাভ কৰিলে। ইউনিচেফ আৰু বি ভি এল-এ এই বিষয়বস্তুবোৰক অধিক প্ৰচাৰ কৰি ডিজিটেলভাৱে ১০ লাখতকৈও অধিক লোকৰ বাবে উপলভ্য কৰি তুলিলে। বিভিন্ন জিলাৰ যুৱচামে ইনফ্লুয়েঞ্চাৰসকলক বাল্যবিবাহৰ বিৰুদ্ধে শক্তিশালী কণ্ঠ হ’বলৈও অনুপ্ৰাণিত কৰিলে।

“যেতিয়া শিশুসকলে নিজৰ কাহিনী কয়, তেতিয়া তেওঁলোকে কেৱল সজাগতাই বৃদ্ধি নকৰে ~ তেওঁলোকে সামাজিক নীতি-নিয়মো সলনি কৰে। অসম আৰু উত্তৰ-পূৰ্বাঞ্চলৰ যুৱক-যুৱতীসকলে প্ৰমাণ কৰিছে যে তেওঁলোক লাভ অৰ্জনকাৰীয়েই, প্ৰতিটো শিশুৰ শিক্ষা লাভ, নিৰাপদ অৱস্থা নিশ্চিতকৰণ আৰু খেলাৰ অধিকাৰ বাস্তৱায়িত কৰাত শক্তিশালী অংশীদাৰ হিচাপেও প্ৰতিপন্ন হৈছে।” — ইউনিচেফৰ অসম আৰু উত্তৰ-পূৰ্বাঞ্চলৰ প্ৰধান ড° মধুলিকা জোনাথনে এনেদৰে কয়।

শিশুসকলৰ শক্তিশালী কণ্ঠৰ বাবে নেতৃবৰ্গৰ ঐক্যবদ্ধ আহ্বান

চৰকাৰ আৰু বিভিন্ন প্ৰতিষ্ঠানৰ জ্যেষ্ঠ নেতৃবৃন্দই শিশুৰ অধিকাৰৰ প্ৰতি নিজৰ দায়বদ্ধতা ৰাজহুৱাভাৱে পুনৰ নিশ্চিত কৰিছে।

অসমৰ মুখ্যমন্ত্ৰী ড°হিমন্ত বিশ্ব শৰ্মাই কয় যে স্ত্ৰী শিক্ষা নিশ্চিত কৰা আৰু বাল্য বিবাহ বন্ধ কৰাটো ৰাজ্যখনৰ অন্যতম মূল অগ্ৰাধিকাৰ। বিশ্ব শিশু দিৱসত অসমৰ প্ৰতিটো শিশুৱে শিকিবলৈ, খেলিবলৈ আৰু উন্নতি সাধন কৰিবলৈ নিৰাপদ, স্বাস্থ্যকৰ আৰু সম্ভাৱনাময় পৰিৱেশ গঢ়ি তোলাৰ বাবে মুখ্যমন্ত্ৰীগৰাকীয়ে নিজৰ প্ৰতিশ্ৰুতিৰ কথা পুনৰবাৰ ব্যক্ত কৰে। অসমৰ ভৱিষ্যৎ ইয়াৰ শিশুসকলৰ পৰাই আৰম্ভ হয় বুলিও তেখেতে উল্লেখ কৰে।

অৰুণাচল প্ৰদেশৰ মুখ্যমন্ত্ৰী পেমা খাণ্ডুৱে অঞ্চলভিত্তিক দায়িত্বৰ বিষয়ত গুৰুত্ব দি কয়, “বিশ্ব শিশু দিৱসত আমি প্ৰতিটো শিশুৰ পৱিত্ৰতা, শক্তি আৰু সীমাহীন সম্ভাৱনাক উদযাপন কৰোঁ। এই দিনটোৱে আমাক স্মৰণ কৰাই যে শিশুসকলে নিৰাপদ, বৈষম্যহীন আৰু সুযোগ-সম্ভাৱনাৰে পূৰ্ণ পৰিৱেশত ডাঙৰ-দীঘল হোৱাটো নিশ্চিত কৰাটো আমাৰ দায়িত্ব। আহক, আমি গুণগত শিক্ষা, স্বাস্থ্য, আৱেগিকভাৱে শক্তিশালী আৰু প্ৰতিটো শিশুৰ অধিকাৰৰ সুৰক্ষাত নিৰন্তৰ সময় অব্যাহত ৰাখোঁ।”

কেন্দ্ৰীয় বন্দৰ, জাহাজ পৰিবহণ আৰু জলপথ মন্ত্ৰী সৰ্বানন্দ সোণোৱালে যুৱক-যুৱতীসকলক নীতি নিৰ্ধাৰণৰ চালিকাশক্তি বুলি অভিহিত কৰি কয়, “শিশুৰ অধিকাৰ হৈছে মানৱ অধিকাৰ। বিশ্ব শিশু দিৱসত আমি প্ৰতিটো শিশুক সুৰক্ষিত কৰা, তেওঁলোকৰ ভৱিষ্যতত বিনিয়োগ কৰা আৰু প্ৰতিটো যুৱ মনৰ মৰ্যাদা, নিৰাপত্তা নিশ্চিত কৰি সুযোগেৰে ভৰা এখন পৃথিৱী গঢ়াৰ সংকল্প লওঁ আহক।”

ভাৰতৰ কন্যা সন্তানৰ বাবে আদৰ্শস্বৰূপ, অলিম্পিক পদক বিজয়ী মীৰাবাঈ চানুৱে ছ’চিয়েল মিডিয়াৰ জৰিয়তে সকলোকে আহ্বান জনাই কয়, “স্থানীয় ভলীবল আৰু ফুটবল লীগত খেলাসকলৰ দৰে বিভিন্ন সম্প্ৰদায়ৰ যুৱ খেলুৱৈসকলে কেৱল প্ৰতিযোগিতাত অংশগ্ৰহণ কৰাই নহয়, তেওঁলোকে সুৰক্ষা, অন্তৰ্ভুক্তি, বাল্য বিবাহ, শিক্ষা আৰু মানসিক সুস্থতাৰ সন্দৰ্ভত আলোচনাৰ জৰিয়তে নেতৃত্ব দিছে। তেওঁলোকে বাট দেখুৱাইছে যে শিশুক স্থান আৰু সুযোগ দিলেহে নিজৰ অধিকাৰ আৰু দলটোৰ অধিকাৰৰ বাবে শক্তিশালী কণ্ঠস্বৰ হৈ উঠিব পাৰে।”

সংগীতজ্ঞ এল’বো নাগাই শিল্প আৰু জনপ্ৰিয় সংস্কৃতিৰ জৰিয়তে এই বাৰ্তাটোৰ প্ৰচাৰ কৰাৰ লক্ষ্যৰ বিষয়ে কয়, “সঘনাই প্ৰাপ্তবয়স্কসকলে শিশুৰ কথা শুনাৰ পৰিৱৰ্তে তেওঁলোকৰ বিষয়ে কয়। এই বিশ্ব শিশু দিৱসত মই মোৰ মঞ্চ ব্যৱহাৰ কৰি তেওঁলোকৰ কথাবোৰ শ্বেয়াৰ কৰিছোঁ: তেওঁলোকৰ দিনটোৰ সৰ্বোত্তম ভাল লগা দিশটো কি, আটাইতকৈ কঠিন দিশটো কি, আৰু তেওঁলোকে প্ৰতিটো শিশুৰ বাবে কি সলনি কৰিব। আমাৰ ভূমিকা হৈছে বিচাৰ নকৰাকৈ শুনা আৰু তেওঁলোকৰ ধাৰণাক গুৰুত্বসহকাৰে লোৱা।”

অভিনেত্ৰী কৃপালাক্ষী গুৰুমায়মে এই কাৰ্যৰ প্ৰতি সমৰ্থন আগবঢ়াই কয়, “যেতিয়া শিশুৱে দৌৰে, জপিয়াই, সেৱা আগবঢ়ায় আৰু নাচে, তেতিয়া তেওঁলোকে “সময় নষ্ট কৰা” নহয় ~ তেওঁলোকে খেলাৰ, স্বাস্থ্যৰ, আনন্দৰ আৰু সুৰক্ষাৰ অধিকাৰ হিচাপে জীয়াই আছে। কোনো শিশুৱেই বাল্য বিবাহ, বিপজ্জনক বা হিংসাত্মক কামৰ বাবে প্ৰস্তুত হ’ব নালাগে। ক্ৰীড়া কোনো বিলাসিতা নহয়; ই তেওঁলোকৰ অধিকাৰৰ অংশ।”

বক্সাৰ অংকুশিতা বড়ো আৰু বাৰ্বি গগৈয়েও যুৱতীসকলৰ মাজত অংশগ্ৰহণে আত্মবিশ্বাস আৰু নেতৃত্ব গঢ় লৈ উঠে বুলি মন্তব্য কৰি ক্ৰীড়া আৰু শিক্ষাৰ ক্ষেত্ৰত ছোৱালীক সহায় কৰিবলৈ সকলোকে আহ্বান জনায়।

যুৱচামে শিশুৰ সুৰক্ষা গঢ় দিয়ে

উত্তৰ-পূবৰ বাবে বিশেষ জুভেনাইল জাষ্টিচ ছেক্ৰেটেৰিয়েট গঠনৰ প্ৰস্তাৱ আগবঢ়াই গুৱাহাটী উচ্চ ন্যায়ালয়ৰ মাননীয় মুখ্য ন্যায়াধীশ আশুতোষ কুমাৰে শিশু সুৰক্ষা ব্যৱস্থাক উপস্থাপন কৰিলে। এই সচিবালয়ে গঠনে শিশু বন্ধুত্বপূৰ্ণ ন্যায়িক প্ৰক্ৰিয়া ত্বৰান্বিত কৰা, ন্যায় বিভাগ আৰু সমাজ-কল্যাণ বিভাগৰ মাজত সমন্বয় দৃঢ় কৰা আৰু জাতিসংঘৰ ‘Convention on the Rights of the Child’–ৰ সৈতে সংগতি ৰাখি জুভেনাইল জাষ্টিচ আইন বাস্তৱায়ন শক্তিশালী কৰাত সহায় কৰিব বুলি আশা কৰা হৈছে।

এই পদক্ষেপৰ দ্বাৰা ইউনিচেফে ৰাজ্যিক ন্যায়িক ব্যৱস্থাৰ সৈতে কৰা সহায়-সহযোগিতাক অধিক শক্তিশালী কৰাত অৰিহণা যোগাইছে, যাতে আইন-ব্যৱস্থাৰ সংস্পৰ্শত অহা প্ৰতিটো শিশুক মান-সন্মান আৰু সহানুভূতিৰ দৃষ্টিৰে চোৱা হয়।

প্ৰতীকী অৰ্থত শিশুসকলৰ অসম আৰক্ষীৰ আসন গ্ৰহণ

ক্ষমতাৰ প্ৰতীকী হস্তান্তৰত “শিশুৰ সৈতে বাৰ্তলাপ” পদক্ষেপত শিশুসকলে এদিনৰ বাবে আৰক্ষী সঞ্চালক প্ৰধানৰ আসন গ্ৰহণ কৰে। চাইবাৰ সুৰক্ষা, সামাজিক চাপ, বিদ্যালয়ৰ সুৰক্ষা আৰু ছোৱালীৰ সুৰক্ষাৰ ওপৰত আৰক্ষীৰ জ্যেষ্ঠ বিষয়াসকলৰ সৈতে গঠনমূলক আলোচনা অনুষ্ঠিত হয়। এই অধিগ্ৰহণে শিশুসকলক প্ৰত্যক্ষভাৱে পৰামৰ্শসমূহ গঢ় দিবলৈ সক্ষম কৰি তুলিছিল আৰু যুৱক-যুৱতীসকলৰ অভিজ্ঞতাৰ বিষয়ে আৰক্ষীক গভীৰ অন্তৰ্দৃষ্টি প্ৰদান কৰিছিল। এই কাৰ্যসূচীয়ে বিদ্যালয় আৰু সম্প্ৰদায়ৰ ভিতৰত সুৰক্ষা উন্নত কৰাৰ বাবে আইন প্ৰয়োগকাৰী আৰু যুৱক-যুৱতীসকলৰ মাজত প্ৰাতিষ্ঠানিক আস্থা আৰু সহযোগিতা শক্তিশালী কৰে।

নীলা পোহৰৰ জয়গান

সামূহিক প্ৰতিশ্ৰুতি দৃশ্যমান কৰিবলৈ অসম আৰু মেঘালয়ৰ ৪৫টা উল্লেখযোগ্য ভৱন নীলা পোহৰেৰে আলোকিত কৰা হয়। ইয়াৰ ভিতৰত আছিল জনতা ভৱন, অসম বিধান সভা ভৱন, মেঘালয় উচ্চ ন্যায়ালয়, অসম আৰক্ষী মুখ্য কাৰ্যালয়, আৰক্ষী আয়ুক্ত কাৰ্যালয় আৰু ৩৭খন জিলাত থকা বিভিন্ন থানা। এই নীলা আলোকসজ্জাই প্ৰতিটো শিশুৰ সুৰক্ষা আৰু শিক্ষাৰ অধিকাৰৰ প্ৰতি সংহতি সূচায়।

ইয়াৰ লগতে ৰাজ্যিক নেতা, অলিম্পিয়ান, ৰাজনৈতিক, সাংস্কৃতিক আৰু খেলজগতৰ ইনফ্লুয়েঞ্চাৰসহ ২০ জনতকৈ অধিক খ্যাতনামা ব্যক্তিয়ে ডিজিটেল অভিযানত অংশ লৈ ১ লাখতকৈ অধিক অংশগ্ৰহণৰ সৃষ্টি কৰে আৰু শিশুসকলৰ কণ্ঠক শক্তিশালী কৰে। জনপ্ৰিয় ব্যক্তিত্ব, সৃষ্টিশীল নেতা আৰু বিভিন্ন প্ৰতিষ্ঠানে অঞ্চলজুৰি শিশুসকলৰ শক্তিশালী কণ্ঠৰ বাৰ্তাক প্ৰচাৰ কৰে।

অসমৰ অভিনেত্ৰী-প্ৰযোজক আইমী বৰুৱা আৰু আৰ জে মেণ্ডীয়ে ইনষ্টাগ্ৰামত “Child in Me – #PromiseToChildren” অভিযানৰ নেতৃত্বত প্ৰায় ১০ লাখ ব্যৱহাৰকাৰীলৈ বাল্য বিবাহৰ ৰোধ আৰু শিক্ষণ আৰু মানসিক সুস্থতাক সমৰ্থন কৰিবলৈ বাৰ্তা প্ৰেৰণ কৰে।

ইউনিচেফৰ মিছন আৰু ভৱিষ্যতৰ কাৰ্যপন্থা

এই অভিযানে সমগ্ৰ উত্তৰ-পূবত ইউনিচেফৰ প্ৰতিশ্ৰুতিক আগবঢ়াই লৈ গৈছে আৰু হিংসা, শিশুক বাল্যবিবাহৰ দৰে ক্ষতিকাৰক কাৰ্যৰ পৰা ৰক্ষা কৰা, গুণগত শিক্ষাৰ সুবিধা শক্তিশালী কৰা আৰু বিদ্যালয়, আদালত আৰু আৰক্ষী – শিশু-বন্ধুত্বপূৰ্ণ আৰু অধিকাৰভিত্তিক প্ৰতিষ্ঠানসমূহ সুনিশ্চিত কৰাত গুৰুত্ব দিছে। ইউনিচেফে ৰাজ্য চৰকাৰ, ন্যায়পালিকা, নাগৰিক সমাজ, ব্যক্তিগত খণ্ড আৰু যুৱক-যুৱতীসকলৰ সৈতে বহনক্ষম পৰিৱৰ্তন নিশ্চিত কৰিবলৈ নিষ্ঠাৰে কাম কৰি যাব।

ইউনিচেফে পুনৰ দৃঢ়তাৰে কয় যে উত্তৰ-পূৰ্বাঞ্চল শিশুৰ বাবে আৰ্হি হ’বলৈ সাজু হৈছে ৰাষ্ট্ৰীয় পৰ্যায়ত অংশগ্ৰহণ আৰু যুৱ নেতৃত্ব দিবলৈ ন উদ্যমেৰে সাজু হৈছে।

“আমি একেলগে এনে এখন উত্তৰ-পূব গঢ়ি তুলিছোঁ য’ত প্ৰতিটো শিশুৱে ক’ব পাৰে আত্মবিশ্বাসেৰে: মোৰ দিন। মোৰ অধিকাৰ। মোৰ খেল।”