INDIA MARITIME WEEK 2025: ভাৰত সামুদ্ৰিক সপ্তাহ, ২০২৫-ত ১২ লাখ কোটি টকাৰ বিনিয়োগ সুনিশ্চিত, ‘আত্মনিৰ্ভৰ ভাৰত’ৰ বাবে সামুদ্ৰিক খণ্ডক শক্তিশালী কৰিবলৈ সাজু ভাৰত

ভাৰত সামুদ্ৰিক সপ্তাহ, ২০২৫-ত ১২ লাখ কোটি টকাৰ বিনিয়োগ সুনিশ্চিত, ‘আত্মনিৰ্ভৰ ভাৰত’ৰ বাবে সামুদ্ৰিক খণ্ডক শক্তিশালী কৰিবলৈ সাজু ভাৰত

প্ৰধানমন্ত্ৰী নৰেন্দ্ৰ মোদী ডাঙৰীয়াই জাহাজ নিৰ্মাণ, সেউজ বন্দৰ আৰু নৌবহৰৰ আধুনিকীকৰণক উজ্জীৱিত কৰিবলৈ বিভিন্ন সামুদ্ৰিক পদক্ষেপ মুকলি কৰিছেঃ সৰ্বানন্দ সোণোৱাল

বিশ্বৰ সামুদ্ৰিক খণ্ডৰ অগ্ৰণী ব্যৱসায়িক নেতৃবৰ্গই ভাৰতৰ সামুদ্ৰিক খণ্ডত বিনিয়োগ কৰাৰ ইচ্ছা প্ৰকাশ কৰিছে গ্ল’বেল মেৰিটাইম চিইঅ’ ফ’ৰামতঃ সৰ্বানন্দ সোণোৱাল

ভাৰত সামুদ্ৰিক সপ্তাহ ২০২৫ত বিনিয়োগৰ প্ৰতিশ্ৰুতি ৪১% বৃদ্ধি পাই ১২ লাখ কোটি টকা হৈছে, ভাৰত সামুদ্ৰিক সপ্তাহ ২০২৩ত ৮.৫ লাখ কোটি টকাৰ বিনিয়োগ সুনিশ্চিত হৈছিলঃ সৰ্বানন্দ সোণোৱাল

DD TIMES মুম্বাই, ৩০ অক্টোবৰ, ২০২৫ঃ কেন্দ্ৰীয় বন্দৰ, জাহাজ পৰিবহণ আৰু জলপথ মন্ত্ৰী সৰ্বানন্দ সোণোৱালে আজি মুম্বাইত এক সংবাদমেলত ঘোষণা কৰে যে- ‘ভাৰত সামুদ্ৰিক সপ্তাহ, ২০২৫’এ সফলতাৰ নতুন শিখৰ চুইছে, য’ত ১২ লাখ কোটি টকাৰো অধিক বিনিয়োগ সুনিশ্চিত হৈছে আৰু অনুষ্ঠানৰ সময়ছোৱাত ৬০০ৰো অধিক বুজাবুজিৰ চুক্তি (MoU) স্বাক্ষৰিত হৈছে।

প্ৰধানমন্ত্ৰী নৰেন্দ্ৰ মোদীয়ে অৰ্থনৈতিক বৃদ্ধি আৰু সামুদ্ৰিক স্থিৰতাক উজ্জীৱিত কৰিবলৈ যুগান্তকাৰী সাগৰীয় পদক্ষেপ মুকলি কৰিছে।

ভাৰত সামুদ্ৰিক সপ্তাহ ২০২৫ৰ তৃতীয় দিনা (২৯ অক্টোবৰ) প্ৰধানমন্ত্ৰী নৰেন্দ্ৰ মোদীয়ে ৰাষ্ট্ৰৰ প্ৰতি একাধিক গুৰুত্বপূৰ্ণ সামুদ্ৰিক পদক্ষেপ মুকলি কৰি উৎসৰ্গা কৰে, যিয়ে সামুদ্ৰিক অমৃতকাল দৃষ্টিভংগী (MAKV) ২০৪৭ৰ অধীনত ভাৰতক বিশ্বৰ সামুদ্ৰিক খণ্ডৰ আগশাৰীৰ শক্তি হোৱাৰ যাত্ৰাত এক প্ৰধান মাইলৰ খুঁটি হিচাপে চিহ্নিত কৰে।

প্ৰধানমন্ত্ৰী নৰেন্দ্ৰ মোদী ডাঙৰীয়াই কৰা ঘোষণাসমূহে আমাৰ চৰকাৰৰ সাগৰীয় ক্ষমতা বৃদ্ধি, স্থিৰতাৰ অগ্ৰগতি আৰু স্থানীয় উদ্ভাৱনৰ প্ৰতি দৃঢ় প্ৰতিশ্ৰুতি প্ৰতিফলিত কৰিছে বুলি সৰ্বানন্দ সোণোৱালে আজি ইয়াত অনুষ্ঠিত সংবাদমেলত কয়।

প্ৰধানমন্ত্ৰীয়ে মুকলি কৰা উদ্যোগসমূহৰ অংশ হিচাপে শ্বিপিং কৰ্প’ৰেচন অৱ ইণ্ডিয়া (SCI)ই ২০৪৭ চনলৈকে নৌবহৰক ২১৬খন জাহাজলৈ বৃদ্ধি কৰাৰ পৰিকল্পনা ঘোষণা কৰে।

মেক ইন ইণ্ডিয়াক এক নতুন গতি দি তেল আৰু গেছৰ ৰাজহুৱা প্ৰতিষ্ঠানসমূহে ৪৭,৮০০ কোটি টকা মূল্যৰ ৫৯খন জাহাজ নিৰ্মাণৰ অ’ৰ্ডাৰ মুকলি কৰে, যিয়ে স্থানীয় জাহাজ নিৰ্মাণ ক্ষমতা বৃদ্ধি কৰিব আৰু উপকূলীয় অঞ্চলসমূহত নতুন চাকৰি সৃষ্টি কৰিব।

সেউজ বন্দৰ কাৰ্যকলাপক প্ৰসাৰিত কৰিবলৈ সেউজ টাগ প্ৰ’গ্ৰেম মুকলি কৰা হয়, যাতে ২০৪০ চনলৈকে ১০০খন পৰিৱেশ-অনুকূল টাগ মোতায়েন কৰা হয়।

প্ৰায় ১২,০০০ কোটি টকাৰ বিনিয়োগেৰে এই পদক্ষেপে ভাৰতৰ স্বচ্ছ আৰু শক্তি-দক্ষ সাগৰীয় লজিষ্টিক্সক ৰূপান্তৰিত কৰিব।

ইয়াৰ উপৰি ড্ৰেজিং কৰ্প’ৰেচন অৱ ইণ্ডিয়াই কাৰ্যকৰী দক্ষতা উন্নত কৰিবলৈ আৰু উপকূলীয় পৰিকাঠামো শক্তিশালী কৰিবলৈ ১১খন নতুন ড্ৰেজাৰৰ সৈতে নৌবহৰ আধুনিকীকৰণৰ পৰিকল্পনা ঘোষণা কৰে।

কালিৰ অনুষ্ঠানত প্ৰধানমন্ত্ৰী নৰেন্দ্ৰ মোদীয়ে মেৰিটাইম লিডাৰ্ছ কনক্লেভ আৰু গ্ল’বেল মেৰিটাইম চিইঅ’ ফ’ৰামত অংশগ্ৰহণ কৰে।

৷ইয়াত বিশ্বৰ সামুদ্ৰিক খণ্ডৰ দূৰদৰ্শী ঔদ্যোগিক নেতৃবৰ্গ আৰু নীতি-নিৰ্ধাৰকসকল একত্ৰিত হয়, যিয়ে এক স্থিৰ আৰু সুদৃঢ় ভৱিষ্যতৰ বাবে সুসজ্জিত সাগৰীয় পৰিৱেশতন্ত্ৰৰ পথ প্ৰশস্ত কৰে।

প্ৰধানমন্ত্ৰী নৰেন্দ্ৰ মোদীয়ে আন্তঃৰাষ্ট্ৰীয় অংশীদাৰসকলক পৰিষ্কাৰ, স্থিতিস্থাপক আৰু অন্তৰ্ভুক্তিমূলক নীল অৰ্থনীতি ত্বৰান্বিত কৰাত পাৰস্পৰিক সহযোগিতা কৰিবলৈ আহ্বান জনায় আৰু ভাৰতৰ সেউজ বন্দৰ, ডিজিটেল ৰূপান্তৰ, জাহাজ নিৰ্মাণ আৰু অন্তৰ্দেশীয় জলপথ উন্নয়নত গুৰুত্ব আৰোপ কৰে।‌

ভাৰতৰ সাগৰীয় খণ্ডত এক ঐতিহাসিক মাইলৰ খুঁটি সৃষ্টি কৰি ভাৰত সামুদ্ৰিক সপ্তাহ ২০২৫ৰ সময়ছোৱাত ১২ লাখ কোটিৰো অধিক মূল্যৰ মুঠ ৬০০ৰো অধিক বুজাবুজিৰ চুক্তি (MoU) স্বাক্ষৰিত হয়, যিয়ে ভাৰতক বিশ্বৰ আগশাৰীৰ সামুদ্ৰিক শক্তি হিচাপে ৰূপান্তৰিত কৰাৰ যাত্ৰাত এক নতুন অধ্যায় চিহ্নিত কৰিছে।

ভাৰত সামুদ্ৰিক সপ্তাহ ২০২৫ত মুখ্য ভাৰতীয় বন্দৰ, বিশ্বৰ বিভিন্ন প্ৰান্তৰ বিনিয়োগকাৰী আৰু প্ৰযুক্তি অংশীদাৰসকলৰ মাজত একাধিক উচ্চমূল্যৰ চুক্তি আনুষ্ঠানিক কৰা হয়, যাতে সাগৰীয় খণ্ডৰ আধুনিকীকৰণ আৰু সেউজ পৰিৱৰ্তনক ত্বৰান্বিত কৰা হয়।

ভাৰত সামুদ্ৰিক সপ্তাহ ২০২৫ “ইউনাইটিং অ’চেনছ, ওৱান মেৰিটাইম ভিজন” বিষয়বস্তুক কেন্দ্ৰ কৰি অনুষ্ঠিত হৈছে।

কেন্দ্ৰীয় গৃহমন্ত্ৰী অমিত শ্বাহে অনুষ্ঠানটিৰ শুভ উদ্বোধন কৰিছিল। ২৭ অক্টোবৰ ২০২৫ৰ পৰা আৰম্ভ হোৱা এই অনুষ্ঠানৰ আজিকে ধৰি চাৰি দিনত ভাৰতৰ নীল অৰ্থনীতিৰ ভৱিষ্যৎ আৰু উত্থানৰ সন্দৰ্ভত ৰোডমেপ প্ৰদৰ্শন কৰা হয়।

বিশ্বৰ এই সৰ্ববৃহৎ সামুদ্ৰিক সমাৱেশত ৮৫খনতকৈও অধিক দেশে অংশগ্ৰহণ কৰিছে, ১ লাখতকৈও অধিক প্ৰতিনিধি, ৫০০ৰো অধিক প্ৰদৰ্শক আৰু ৩৫০ৰো অধিক আন্তঃৰাষ্ট্ৰীয় বক্তাই অংশগ্ৰহণ কৰিছে।

ন’ৰৱে, ডেনমাৰ্ক, নেদাৰলেণ্ড আৰু ছিংগাপুৰৰ দৰে আগশাৰীৰ সামুদ্ৰিক দেশসমূহৰ সক্ৰিয় উপস্থিতি আছিল লক্ষ্যণীয়।

জইণ্ট ৱৰ্কিং গ্ৰুপছ (JWG), দ্বিপাক্ষিক বৈঠক, বৃহৎ প্ৰতিনিধি দল আৰু মন্ত্ৰী পৰ্যায়ৰ অংশগ্ৰহণেৰে বিভিন্ন অধিৱেশন অনুষ্ঠিত হৈছে।

এই সংযোগসমূহে ভাৰত আৰু এই সামুদ্ৰিক দেশসমূহৰ মাজত সামুদ্ৰিক পাৰস্পৰিক সহযোগিতা যথেষ্ট বৃদ্ধি কৰিছে, যাৰ লক্ষ্য হৈছে স্থায়িত্ব, প্ৰযুক্তি আৰু সামুদ্ৰিক উদ্ভাৱনী ক্ষেত্ৰত পাৰস্পৰিক লক্ষ্যসমূহ আগুৱাই লৈ যোৱা।

কেন্দ্ৰীয় বন্দৰ, জাহাজ পৰিবহণ আৰু জলপথ মন্ত্ৰী সৰ্বানন্দ সোণোৱালৰ উপৰি কেন্দ্ৰীয় ৰাজ্যিক মন্ত্ৰী শান্তনু ঠাকুৰৰ উপৰি বিভিন্ন কেন্দ্ৰীয় মন্ত্ৰীয়ে বিভিন্ন অধিৱেশনত অংশগ্ৰহণ কৰে।

নীতিন গাডকাৰী, ভূপেন্দৰ যাদৱ, কিৰেণ ৰিজিজু, হৰদীপ সিং পুৰী, কীৰ্তি বৰ্ধন সিং, ড° মনসুখ মাণ্ডৱিয়া, শ্ৰীপদ নায়ক এই অনুষ্ঠানত উপস্থিত আছিল।

তদুপৰি, বিদেশৰ এঘাৰজন মন্ত্ৰীয়ে তেওঁলোকৰ প্ৰতিনিধি দলৰ সৈতে অনুষ্ঠানত অংশগ্ৰহণ কৰিছিল।

মৰিচাছ, ম্যানমাৰ, নেদাৰলেণ্ড, ন’ৰৱে, ছিংগাপুৰ, ইটালী, লাইবেৰিয়া, এণ্টিগুৱা এণ্ড বাৰ্বুডা, মালদ্বীপ, ছৌদি আৰৱ আৰু শ্ৰীলংকাৰ আদিৰো প্ৰতিনিধি উপস্থিত আছিল।‌

অনুষ্ঠানত ভাষণ দি কেন্দ্ৰীয় বন্দৰ, জাহাজ পৰিবহণ আৰু জলপথ মন্ত্ৰী সৰ্বানন্দ সোণোৱালে কয়, “৬০০ৰো অধিক বুজাবুজিৰ চুক্তি স্বাক্ষৰিত হোৱাটোৱে ভাৰতৰ সামুদ্ৰিক খণ্ডৰ সুযোগ-সম্ভাৱনাত অভূতপূৰ্ব বিশ্বজুৰি আস্থা প্ৰদৰ্শন কৰিছে।

এই অংশীদাৰিত্বসমূহ কেৱল বিনিয়োগেই নহয়— এইবোৰ এক স্থিৰ আৰু প্ৰতিযোগিতামূলক সাগৰীয় ভৱিষ্যৎ গঢ়ি তোলাৰ এক নতুন দিগন্তৰ মুকলি। এই চুক্তিসমূহে হাজাৰ হাজাৰ দক্ষ চাকৰিৰ সৃষ্টি কৰিব বুলি আশা কৰা হৈছে।

লগতে ই বন্দৰ আৰু জাহাজ পৰিবহণ ক্ষমতাক ত্বৰান্বিত কৰিব আৰু ভাৰতৰ সেউজ আৰু ডিজিটেল সাগৰীয় অৰ্থনীতিলৈ ব্যাপক ৰূপান্তৰ আনিব।”

৮৫খনতকৈও অধিক দেশ আৰু ৫০০ আন্তঃৰাষ্ট্ৰীয় কোম্পানীৰ অংশগ্ৰহণেৰে ভাৰত সামুদ্ৰিক সপ্তাহ ২০২৫ বিশ্বৰ সৰ্ববৃহৎ সামুদ্ৰিক সমাৱেশ হিচাপে পৰিগণিত হৈছে। ইয়ে প্ৰধানমন্ত্ৰী মোদী ডাঙৰীয়াৰ ‘বিকশিত ভাৰত ২০৪৭’ৰ দৃষ্টিভংগীক নীল অৰ্থনীতি বৃদ্ধিৰ এক বাস্তৱিক পথ-প্ৰদৰ্শকলৈ পৰিণত কৰিব।

এক ডজনতকৈও অধিক সামুদ্ৰিক ৰাষ্ট্ৰৰ ঔদ্যোগিক নেতৃবৰ্গ আৰু প্ৰদৰ্শকসকলে ভাৰত সামুদ্ৰিক সপ্তাহ ২০২৫ত অংশগ্ৰহণ কৰিছে, যিয়ে পাৰস্পৰিক সহযোগিতা আৰু সামুদ্ৰিক উদ্ভাৱনীৰ বাবে বিশ্ব মঞ্চ হিচাপে ভাৰতৰ ক্ৰমবৰ্ধমান মৰ্যাদাক আন্দোলিত কৰিছে।

ছুইডেন, জাৰ্মানী, চুইজাৰলেণ্ড, নেদাৰলেণ্ড, ইউএই, ন’ৰৱে, ডেনমাৰ্ক, ছিংগাপুৰ, ফিনলেণ্ড, ইউকে, ফ্ৰান্স আৰু জাপানৰ প্ৰতিনিধি দল আৰু কোম্পানীসমূহে অত্যাধুনিক প্ৰযুক্তি আৰু স্থিৰ সামুদ্ৰিক সমাধান প্ৰদৰ্শন কৰিছে।

বিভিন্ন ৰাজ্য আৰু কেন্দ্ৰীয়শাসিত অঞ্চলৰ ২০জনতকৈও অধিক মন্ত্ৰীয়ে ভাৰত সামুদ্ৰিক সপ্তাহ ২০২৫ত অংশগ্ৰহণ কৰে আৰু তেওঁলোকে একাধিক অধিৱেশন, কাৰ্যসূচীত ভাগ লয়। কেন্দ্ৰ আৰু ৰাজ্যসমূহৰ মাজত ভাৰতৰ সাগৰীয় আৰু নীল অৰ্থনীতিৰ লক্ষ্যসমূহক আগুৱাই নিবলৈ ক্ৰমবৰ্ধমান সহযোগিতা প্ৰদৰ্শন কৰা হয়।

ভাৰত সামুদ্ৰিক সপ্তাহ ২০২৫ত ১৯টা বিষয়ভিত্তিক অধিৱেশন আৰু ৫০টাৰো অধিক উপ-অধিৱেশন অনুষ্ঠিত হৈছে, যিয়ে সাগৰীয় খণ্ডৰ প্ৰাধান্যতা আৰু ভৱিষ্যতৰ সুযোগসমূহৰ এক বিস্তৃত অনুসন্ধান ত্বৰান্বিত কৰে।

কেন্দ্ৰীয় বন্দৰ, জাহাজ পৰিবহণ আৰু জলপথ মন্ত্ৰী সৰ্বানন্দ সোণোৱালে ভাৰতৰ সামুদ্ৰিক পুনৰুত্থানত বিশ্বব্যাপী আস্থা প্ৰতিফলিত কৰি ২০২৫ চনৰ ভাৰত সামুদ্ৰিক সপ্তাহত ১২ লাখ কোটি টকাৰ বিনিয়োগৰ অভিলেখ সংখ্যক কৃতিত্ব প্ৰকাশিত কৰে।

কেন্দ্ৰীয় মন্ত্ৰীগৰাকীয়ে কয়, “ভাৰত সামুদ্ৰিক সপ্তাহ ২০২৩ৰ পৰা ২০২৫ৰ সন্মিলনত ৪১% উত্থানে বহনক্ষম বন্দৰ নেতৃত্বাধীন উন্নয়নৰ ক্ষেত্ৰত ভাৰতৰ ক্ৰমবৰ্ধমান নেতৃত্ব আৰু বিশ্বৰ নীল অৰ্থনীতিৰ অগ্ৰণী চালিকাশক্তি হিচাপে ভাৰতৰ উত্থানক আলোকপাত কৰিছে।

এয়া আমাৰ গতিশীল প্ৰধানমন্ত্ৰী নৰেন্দ্ৰ মোদীৰ দূৰদৰ্শী নেতৃত্বৰ প্ৰত্যক্ষ ফল। তেখেতে বলিষ্ঠ নেতৃত্বৰে ভাৰতৰ সামুদ্ৰিক খণ্ডক আত্মবিশ্বাস আৰু সুযোগৰ নতুন শক্তিলৈ ৰূপান্তৰিত কৰিছে।”